କବିତା
ସୁବଳ ମହାପାତ୍ର
କବିତା ଗୁଡିକ ……
ମନ୍ତ୍ରମୁଗ୍ଧ କରେ…
ହଜେଇ ଦିଏ କୌଣସି ଏକ ଅଲଗା ଦୁନିଆଁ ରେ….
ହଲେଇ ଦିଏ ହୃଦୟ ତନ୍ତ୍ରୀ କୁ….
ଭାଙ୍ଗି ଦିଏ ମନ ର ଅକଥ୍ୟ ବେଦନା କୁ…..
ଖଣ୍ଡ ଖଣ୍ଡ କରି ବିଦାରି ଆଣେ….
ମୁହଁ ଉପରେ ଘୋଡେଇ ହୋଇଥିବା ଭଦ୍ରତା ର ମୁଖା ଟିକୁ….
ଆଉ….
କହିବା ବାହୁଲ୍ୟ
ଖୋଲି ଦିଏ ନିଜର ଚରିତ୍ର କୁ ନିଜ ଆଗରେ…
ଲଙ୍ଗଳା କରି ଦେଖେଇଦିଏ ନିଜକୁ ଦର୍ପଣ ରେ ନିଜ ମୁହଁ ଦେଖିଲା ପରି…
ମନର କୌଣସି କୋଠରୀ ରେ ଶକ୍ତ କୁଠାରଘାତ କରି…
ଛଡେଇ ଆଣିବାକୁ ଚାହେଁ ….
ନିଜ ପିଲା ଦିନ ଟିକୁ …
ଯେଉଁଠି
ଏକ ନିଷ୍ପାପ ଶିଶୁ ଟିଏ ଠିଆ ହୋଇଥିଲା,
ଜାଣି ନଥିଲା କି ଚିନ୍ହି ନଥିଲା ଦୁନିଆଁ କୁ…
କାନ୍ଦୁରା ମୁହଁ ଟିରେ ବୋହି ଯାଉଥିବା ସିଙ୍ଘାଣି କୁ ଜିଭ ରେ ଚାଟି…
ମା ମା ବୋଲି ରଡି ଛାଡୁଥିଲା…
ଏକ କଦମ୍ବ ଗଛ ମୂଳରେ ଠିଆ ହୋଇ…..
–X–
ସୁବଳ ମହାପାତ୍ର
ଗାନ୍ଧିନଗର, ଗୁଜରାଟ , ୩୮୨୦୦୯
ପିତା : ଶେଖର ଚନ୍ଦ୍ର ମହାପାତ୍ର ,ମାତା : ମଞ୍ଜୁଶ୍ରୀ ମହାପାତ୍ର I ଜନ୍ମ ସ୍ଥାନ : ଖଲାରୀ,ଅନୁଗୁଳ,ଓଡିଶା-୭୫୯୧୨୨ । ବୃତ୍ତି : ସଫ୍ଟୱାର ଇଞ୍ଜିନିଅର, ଏକ ବହୁରାଷ୍ଟ୍ରୀୟ କମ୍ପାନୀ ରେ ବିଜନେସ ଟେକ୍ନିକାଲ ମ୍ୟାନେଜର ରୂପେ ଗାନ୍ଧିନଗର, ଗୁଜରାଟ ରେ କାର୍ଯ୍ୟ ରତ I ଲେଖାଲେଖି ଆରମ୍ଭ ୨୦୧୪ ରୁ I ଗଳ୍ପ ପଢୁ ପଢୁ ହଠାତ ମନହୁଏ ମୁଁ ଗୋଟେ ଗପ ଲେଖନ୍ତି ନି ? ଆଉ ୨୦୧୪ ରେ ଲେଖି ବସେ ଏକ ଗଳ୍ପ I କିନ୍ତୁ ଗଳ୍ପ ଟି କାହିଁକି କେଜାଣି ମନ କୁ ପାଏନି I ତା ପରେ ଆଉ ଦୁଇଟି ଗଳ୍ପ ପତ୍ରିକା ରେ ଆସିବା ପରେ ଚାଲେ ପଢା I ପଢିବା ପାଇଁ ନୁହେଁ ଲେଖିବା ପାଇଁ ପଢା I ଆଉ ଆସ୍ତେ ଆସ୍ତେ ନିଜ ଭୁଲ କୁ ସୁଧାରି ସୁଧାରି ଆଜି ପାଖାପାଖି ୫୦ ଉପରେ ଗଳ୍ପ ଆସିଗଲାଣି ଆହ୍ବାନ, ଆମେଓଡ଼ିଆ, ବେଦାନ୍ତୀ, ପୌରୁଷ ଓ ଷ୍ଟୋରି ମିରର ପରି ପତ୍ରିକା ରେ I କୋଡିଏ ଟି ଗଳ୍ପ କୁ ନେଇ ଏକ ଗଳ୍ପ ସଂକଳନ "ସପ୍ତଫେଣି " ଷ୍ଟୋରି ମିରର ଆପ୍ପ ରେ ଇ-ବୁକ ଭାବେ ପ୍ରକାଶିତ I ପ୍ରକାଶିତ ଗଳ୍ପ ଭିତରେ ଜୀବନ ସଂଘର୍ଷ, ତୃତୀୟ ଲିଙ୍ଗ, ଅନାବିଳ ପ୍ରେମ, ଛାଡଖାଇ, ସମ୍ପର୍କ, ଟଗର ଫୁଲ ଆଦି ବହୁଳ ମାତ୍ରା ରେ ପାଠକୀୟ ସ୍ୱୀକୃତି ପାଇଛି I ନିତିଦିନିଆ ଘଟଣା ରୁ କାହାଣୀ ଖୋଜି ନାୟକ ମାନଙ୍କୁ ସଜେଇ ଗଳ୍ପ ଲେଖିବାକୁ ଭଲପାଏ I ପ୍ରାୟ ସବୁ ଗଳ୍ପ ଗୁଡିକ ନିଜ ଆଖପାଖ ରେ ଘଟୁଥିବା ଘଟଣା ବଳି, ମୁଁ କେବଳ ଟିକେ ଅଧିକ ନିରିଖେଇ ଦେଖେ I ମୋ ଗଳ୍ପ ଗୁଡିକ ଆପଣ ମାନଙ୍କୁ ମଧ୍ୟ ଆନନ୍ଦ ଦେବ ଏତିକି ଆଶା I ରୁଚି - ମିନି ଗଳ୍ପ, ଗଳ୍ପ ଓ କବିତା ଲେଖିବା ଅଭ୍ୟାସ-ଗଳ୍ପ ବହି ଓ ପତ୍ରପତ୍ରିକା ପଢିବା I
View All Posts
ଓଡ଼ିଆ କାହାଣୀ 