ରିକ୍ସା ଵାଲା ର ଝିଅ

ସୁବଳ ମହାପାତ୍ର

ମୁନି ର ବାପା ରିକ୍ସା ଟାଣେ I ଫି ଦିନ ଘରେ ଖାଇବାକୁ ନଥାଏ I ନାହିଁ ନାହିଁ ର ସଂସାର I ବାପା ରିକ୍ସା ଟାଣି ପଇସା ଆଣିଲେ ଘର ଚାଲେ I ସେଥିରୁ ବି ଗୋଟେ ଭାଗ ତା ମଦ ପିଆରେ ଯାଏ I ଯେଉଁଠି ଘରେ ଖାଇବାକୁ ଗଣ୍ଡେ ନାହିଁ ସେଠି ଆଉ ସବୁ କଥା କିଏ ପଚାରେ I ମୁନି, ୧୧-୧୨ ବର୍ଷ ର ଝିଅ ଟି ସଜେଇ ହେବାକୁ ଭାରି ଭଲ ପାଏ I ମା ଯେଉଁ ବାବୁ ଘରେ କାମ କରେ ତାଙ୍କ ଘରେ କେତେ ପ୍ରକାର ସ୍ନୋ, ପାଉଡର, ଭଳିକି ଭଳି ଦେହ ଲଗା ଜିନିଷ, ମୁଣ୍ଡ ପାଇଁ, ଆଖି ପାଇଁ, ନଖ ପାଇଁ, ମୁହଁର ଅଲଗା ପାଉଡର, ଦେହର ଅଲଗା ପାଉଡର ଆହୁରି ଆହୁରି କେତେ କଣ I ତାଙ୍କ ଘରେ କିନ୍ତୁ କିଛି ନାହିଁ I ସକାଳୁ ମା ପାଣି ମାରି ମୁଣ୍ଡ କୁଣ୍ଡେଇ ଦିଏ I ଏତେ ଛୋଟରୁ ତେଲ ନ ବାଜି ମୁଣ୍ଡ ବାଳ ସବୁ କହରା ହେଇ ଗଲାଣି I ମଝି ବାଳ ତକ ସବୁ କହରା I ମୁନି ସବୁ ବେଳେ ମନ ଦୁଃଖ କରେ I ତା’ ମା ଉପରେ ରାଗେ I ବାପା କୁ ଗାଳି କରେ I କାନ୍ଦି କାଟି ଅଥୟ ହୁଏ I କିନ୍ତୁ କିଏ ପଚାରୁଛି I ମା ଠୁ ଚାପୁଡ଼ା ଖାଇ ଆଉ ବାପା ର ନାଲି ଆଖି ଦେଖି ଶାନ୍ତ ହୁଏ I

ବାବୁଙ୍କ ଝିଅ ବର୍ଷା I ଭାରି ଷ୍ଟାଇଲିଶ I ଭଳିକି ଭଳି ଜିନିଷ ରେ ସଜେଇ ହୁଏ I ଏ ବର୍ଷ ଇଞ୍ଜିନିଅରିଂ ପଢୁଛି I ସ୍କୁଟି ଧରି କଲେଜ ଯାଏ I ବାଳ ଫୁରୁ ଫୁରୁ I ଫି ଦିନ ସାମ୍ପୁ କରେ I ଭଳି କି ଭଳି ତେଲ ଲଗାଏ I ବାପା ମାଙ୍କର ପଇସା ରେ ଅଭାବ ନାହିଁ I ବାପା ବଡ ଚାକିରୀ କରିଛନ୍ତି I ମା ବି ସେମିତି I ଦି ଜଣଙ୍କ ଦରମା ଘରକୁ ଆସେ I ବହୁତ ବଡ ଘର I ବହୁତ ପଇସା I ସେଦିନ ବର୍ଷା ଦିଦି ବାଳ କଲର କରି ଆସିଥାନ୍ତି I ଆଗ ବାଳ ତକ କଳା ମଝି ତକ କହରା I ପଛ ଚୁଟି କିଛି କଳା ଆଉ କିଛି କହରା I ତାଙ୍କ ସାଙ୍ଗ ମାନେ ତାଙ୍କର ଖୁବ ପ୍ରଶଂସା କରୁଥାନ୍ତି I ବାଃ, ଭାରି ବଢିଆ ହେଇଛି I କେଉଁ ପାର୍ଲର ବୋଲି ହଜାରେ ଥର ପଚାରୁଥାନ୍ତି I ବର୍ଷା ଦିଦି ବି ବଡେଇ ଦେଖେଇ ହେଇ କହୁଥାନ୍ତି I କେମିତି ଷ୍ଟାଇଲ କରିଛି, କେତେ ପଇସା ନେଲା ଇତ୍ୟାଦି ଇତ୍ୟାଦି I

ହଠାତ କାହାର ଜଣଙ୍କର ନଜର ପଡିଲା ମୁନି ଉପରେ I ଆଉ ସମସ୍ତଙ୍କ ମୁହଁ ବନ୍ଦ ହେଇ ଆସିଲା I

ମୁନି କିନ୍ତୁ ଆଜି ଭାରି ଖୁସି ଥିଲା….. ତା’ ର ଆଉ ବର୍ଷା ଦିଦିଙ୍କ ଚୁଟି ର କଲର ସମାନ ଥିଲା I

—- ସମାପ୍ତ —-

ସୁବଳ ମହାପାତ୍ର

ଗାନ୍ଧିନଗର, ଗୁଜରାଟ , ୩୮୨୦୦୯

ଦୂରଭାଷ – ୯୩୭୬୦୧୨୫୦୦

ଇମେଲ – subal.mohapatra@gmail.com